تمنت شابة أن تكون ذكراً كونها ترى أن الذكور في مجتمعنا يحظون بحرية أكبر. ولكن كما يقول المثل "احذر مما تتمناه". دوز يتمنى لكم قراءة ممتعة للنص الذي كتبته الشابة هديل قاسم.

"طول عمري بحلم أكون شب، بس إني أنام بنت وأصحا شب إشي من الخيال......
يومها كنت متقاتلة مع إمي عشان مش مخليتني أطلع على عيد ميلاد صاحبتي، قال الوقت متأخر ...
بس أخوي إجى قلها باي وطلع... صرت أحكي يا رب أصير شب وأعيط ... وصحيت لقيتني صرت شب

أول شي استغربت من حالي وبلشت أصرخ، إجت إمي بتحكيلي قوم يما يا أحمد اشتريلني الفطور، يما أنا بنت سهام؟ 
بس إمي ولا عبرتني من الواضح إنه الكل نسيني وبتعاملوا معي عأساس شب....

قمت مكسلة من النوم، ورحت أشتري فطور، كنت مكيفة، وأنا بدي أنزل أمي بتحكي كب الزبالة بطريقك ..
أنا صرت أحكي ييي قرف ... أبوي ضربني كف عضهري خسفه خسف.. نزلوا اليوم بدي أنزلك معي عالشغل ...
بس يابا أنا ما صدقت أعطل عن الجامعة، قلي روح ولما ترجع بنتفاهم...
وصلت الحمص والفول كان المحل أزمة مش طبيعية، وقفت يمكن نص ساعة وزهقت حالي، روحت أفطرنا بالعادة بعدها كنت أروح أحكي مع سامية صاحبتنا .. مسكني أبوي وقلي يلا عالشغل مش بدك تخطب وتتزوج؟

رحت مع أبوي كان يشتغل بالباطون، كان الجو نار، وأنا حاسة راسي رح ينطبخ، يابا رح أمرض، وهو يقلي اشتغل يلا، حسيت ضهري طقطق من الكياس الي حملتهن، وياباي ما أصعب الشغل وجهي صار أسود أسود، وبعد ما روحت ما كان فيي حيل لأطلع حتى، إلا هو بحكيلي أبوي روح جيب عمتك عنا... يابا تعبان..

صرخ علي لأجيبهم وجبتهم، وكل يوم صرنا على هالمنوال، صحيح أحيانا بطلع بطش مع أصحابي اه صرلي صحاب، بس كل طشاتنا مملة وبنضل بالشوارع نتسرمح، صرت أعاني من النسوان لما نروح عالسوق ساعتين وأنا بستنى فيهم وروحي تفرفط، ولا الشغل لحاله كارثة، وأخيرا قررت أخطب، يا سلام محلا الاختيار ....

طلعت الشغلة مش بهالسهولة، حبيت بنت، وضليت ألف حواليها، وهي تصدني ومش معبرتني، وما خليت ولا طريقة لاحكي معها، بالاَخر جبت رقم أبوها، عشان أخطبها، بس وصلنا بيتهم طلبوا مهر 5000 دينار، وعرس بصالة 2000 دينار، وفستان بـ1000 دينار غير الحفلات والكوافيرة والتلبيسات، صرت أشتغل ليل نهار لأجييهن وأحكي اخ أيام ما كنت بنت كان ولا بعمل إشي هسا علي أطلب وأتدلل..

طبعا مرت الخطبة على هدايا وروحات وطلعات وفت مصاري وأنا مش ملحق ومليون هم براسي وقروض ودار حماي ومستعجلين عالجيزة؛ تزوجنا، صارت تتصل كل دقيقة جيب إشي، ابنك طلع الشيب براسي، مسؤولية البيت ومصاريفه؛ اشتغل مش ملحق ولما أروح عالدار ارتاح تصير تنق بدها تطلع مشوار! وأصوات من كل النواحي جيب جيب .. روح تعال ... اشتري..

واَخر شي صرت أصرخ مشان الله شوووو قل عقلي وخلاني أصير شب.. صحيت عأمي بتحكيلي ولك سهام مالك انهبلتي قومي أبوكي وافق تروحي عالحفلة، بقلها مصرتش أحمد ... بتحكيلي شكلك انهبلتي..

حمدت ربي إني لساتني بنت، وقلت فعلاً الله يعين الشباب عحياتهم، صحيح في بنات مظلومات ومش ماخدات حريتهن، بس الشباب مظلومين كمان..".

كتابة: هديل قاسم