"بعد27 سنة اكتشفت إنه الحياة مسخرة، ما فيها شي بستاهل، لا نحب ولا نكره، ولا حتى نتزوج ونجيب ولاد... مثلي مثل أي شب بحلم، ومثلي مثل أي إنسان بشوف غيره بحقق حلمه وهو مكانه، قررت أهد أحلامهم لحتى اسمي يكبر ....
بالبداية من لما البنت إلي حبيتها، تزوجت عسنة ثانية جامعة واحد معفن ما بيسوى بصلة، عشان المصاري، وعسنة رابعة كانت حاملة عإيدها ولد ومطلقة، برغم إني حبيتها إلا إني شمتت فيها... وبعدها، لما كل دفعتي تخرجت، إلا أنا وكم شب فاشلين ضلينا مكوعين ونعيد نفس المادة، صرت بدي أنتقم من الدكتور إلي بسببه حملت المادة، وبخلال الفصل اكتشفنا إنه معه سرطان أنا كيفت، انشفا غليلي...
نجحت وتخرجت، لما رحت على المقابلة كان اسمي بعد بنت واحد واصل بهالبلد، أنا عارف إنه رح يوظفوها تلقائي، عملتلها طوشة، وصرت أستفز فيها لحتى طردوني أنا وياها، شفتها بتبكي دلوعة البابا! كيفت...
وبعدها بلشت مرحلة اكتشاف أخطاء الغير لحتى أخلص هالمجتمع منهم .. صرت أشوف رسام شاطر... أحكيلوا إنت فاشل وأشن حرب ضده وأحاول أرسم لحالي ..وتطلع رسمتي بتخزي .... أكمل تعليق عالرسام.. أحاول أكتب، أشوف شخص ناجح بالكتابة، أبلش أحبط في وأشن هجوم ضده لإني غيران على الأدب ومحاولتش اكتب!
حتى لما قررت أتزوج ، دورت على بسة مغمضة، وحدة بتفهمش الـ1 من الـ10 لحتى أربيها عإيدي، وأكون أنا متعلم أكثر منها وأشوف حالي عليها.... لما أشوف 2 مبسوطين، لازم أعلق عليهم، أخرب الانسجام الي بينهم بأي طريقة، وأشوفهم تمشكلو لأنبسط.....
مشى العمر وكبرت، لقيت حالي وحيد، لا وظيفة ولا زوجة ولا ولاد، البنت إلي شمتت فيها لإنها اتطلقت ، تزوجت واحد ثاني معيشها ملكة، والبنت لي خربت الوظيفة عليها صارت صاحبة شركة، الرسام إلي قلت عنه فاشل صار رسام عالمي، والكاتب إلي شنيت حرب ضده، كتب أفلام ومسلسلات وصار مشهور كثير، والبسة المغمضة الي تزوجتها سرقت ذهباتها وفلوسي وهربت لإنها متحملتنيش، وأنا صفيت لحالي وحيد، وخايف يصير معي المرض، أكيد عارفين شو هو، نفس مرض الدكتور الجامعي إلي شمتت في ..
قصة خيالية بس تخيلوا كل شي بحياتنا بصير هيك، الشغلات السودا الي بنتمناها لغيرنا، فشلنا إلي بنحاول نحمل غيرنا ذنبه، والشماتة، والمسخرة عأحلام الناس، تخيلوا تلف الدنيا وتدور وتعطينا كل شي سيء بنتمنى لغيرنا، ونلاقي حالنا بالوقت لي نشغلنا بالناس، هدول الناس اشتغلو عحالهم ليوصلوا".
كتابة: هديل قاسم
* النص من خيال الكاتبة
