"أنا وحيدة أهلي، طول عمري نفسي يكون عندي أخت، أتقاتل معها، ألعب معها، تنصحني أنصحها، ليوم قالتلي أمي، في صديقات بكونوا أعز من الأخت، وحكتلي عن صاحبتها سامية كيف صرلها معها من 25 سنة صاحبات من وقت ما كانوا بالجامعة، وإنها أعز من أختها، صرت أدور على صاحبة تكون مثلها، وتكون أخت لألي....
كنت أضل قاعدة بالساحة وأعيط، لي أنا ما إلي صاحبة مثل كل البنات، لي ما إلي أخت، وكبرت وصاروا عدد الصديقات يزيد كثير، صرت وين ما أروح أصاحب ناس، أحكي معهن وعطول أوثق فيهن وأحبهن، إلا بنت اسمها وعد كنت أكرهها ..وما أطيقها... لأنها عاملة حالها الفهمانة...
لما بلشت ألبس مريول قصير وبنطلون سكني، كل صاحباتي حكولي إني بجنن، وطالعة فايعة وحلوة، إلا هي، صارت تحكيلي من قهرها: والله مو حلو هيك، كنتي قبل أحلى.. ولما صرت بصف 11، بلشت أحط مكياج، كل صاحباتي يحكولي إنه المكياج بجنن على وجهي، إلا هي تحكيلي برائتك أحلى! بالتوجيهي، كان الصف مختلط، ومعنا شب بجنن اسمه عمر، كل البنات كانوا قاتلات حالهم عليه، وهو بس يضل يحكي معي أنا، فكانت تيجي وعد تحكيلي كرمالي إبعدي عنه هالشب صايع، وبحكي عنك للشباب إنك مايعة!
يومها رحت حكيت لعمر، وبهدلها بهدلة قدام الكل، وشل أملها، شفتها قاعدة بالساحة ومخزية من إلي عملته! ومن غيرتها لما نجحنا بالتوجيهي، سجلت معي بنفس التخصص والجامعة.. ودخل عمر الجامعة معي، بيوم من الأيام كنت أحكي مع عمر، وحكالي باي، بس شكلو ما انتبه لإنه ما سكر الخط، سمعته بيحكي لأصحابه عني، بحكيلهم بضحك عليها وسمعتوا كيف قاتلة حالها علي، أصلا هي بنت فايعة وما بتلزمني لا هي ولبسها ولا طريقة كلامها ...
أنا انهرت وصرت أعيط، ما لقيت ولا وحدة من صاحباتي حوالي، كلهم كانوا شمتانين، ويحكولي إنتي الي بدك تحبي، شفت وعد بتركض لعندي قعدت جنبي وحضنتني، ولا سألتني شو في، ولا شو مالي، ضلت تحكيلي ما في شي بستاهل تزعلي مشانه، والحياة تجارب. أنا وقتها صحصحت عحالي وعرفت إنها وعد كانت صديقتي الحقيقية بين هالكل، الي ما بتجاملني على الغلط، الي تحملت جفاصتي وزناختي بالمعاملة معها، الي ما غشتني مثل الباقيات، صديقتي الي ضلت معي وأنا بضعفي ....
صفنت كثير وتذكرت إنه أنا السيئة معها بكل المواقف، أنا الي كنت بدي أفهمها غلط، مع إنها كانت تحبني وتحب مصلحتي، عرفت إنه الصديق الحقيقي إلي بضل معنا سنين هو الي قلبه أبيض وطاهر، الي ما بحب يشوفنا بنغلط وبنسكت ولو عحساب كرهنا أو حبينا.. صديقنا الحقيقي بكل يوم ... وبكل وقت وبكل لحظة..
وحكيت فعلياً أحيانا بننحرم من الأخت بس بتيجي بنت بتكون مثل الأخت وأكثر بتحبنا ولا لمصلحة ولا لشي، ومن يومها صرنا أنا ووعد صحبة كثير، أنصحها وتنصحني، وأحلى شي لما نقعد نحش بنت أنا وياها، وبنحب الأكل كثير، يا الله شومرتاحة مع أختي الجديدة :)
صحيح الأخت ما في بعدها وبتضل غير، بس لما ما يكون عنا خوات ومو بإيدنا، ما إلنا ملجأ غير الصداقة".
كتابة: هديل قاسم
