"اليوم عرس صاحبتي الوحيدة!
كانت حلوة كثير، وطايرة من الفرحة وخاصة إنها مع الرجال إلي تمنته طول حياتها...
وقفت وصفنت فيها، نزلت دمعتي، يا خلص رح تروح إلي كانت تفهمني....
تذكرت إنها صاحبتي من سنين طويلة، كيف كاسرة كل الحواجز إلي بيني وبينها، ما بستحي أروح عندها الصبح وأفتح ثلاجتها وأبلش أكل وأحكيلها جعانة وهي اللقمة بتمي وتحكيلي سم الهاري! كلي شوي شوي! ونصير نضحك ....
وكيف لما أكون مخنوقة من موضوع، اتصل عليها تحكيلي مالك يا بومة، شو لي مزعلك، أقعد أردحلها ساعات، شوي نعيط، شوي نحش بنت مش عاجبتنا وندخل مليون موضوع بموضوع، وبالاَخر نضحك ونسكر التلفون!
شفتها بتأشرلي من بعيد، أنا مسحت دمعتي وضحكت، طلعت لعندهها عاللوج، بحكيلها شو يعني اليوم بدك تشوفي حالك علينا عشانك عروس ...
حكتلي ولك جعانة ... العرس بجوع!
أنا حششت ضحك، ولك فضيحة إنتي!
همستلي مش رح تيجي معي اليوم!
لفيت وجهي وقلتلها التهي بعريسك ونزلت عن اللوج، وقفت بزاوية تكون وراها وصرت أعيط!
اه اتذكرت لما كنا نحكي بيوم عرسنا بدنا نوزع شاورما، عشان ما بنتحمل نضل بدون أكل.....
وكيف كنا بالجامعة مثل بينكي وبرين!
هي قصيرة وذكية وأنا طويلة هبلة.. هيك كانوا يحكولنا ....
تتصل علي من الساعة 7 خبيت أكل من إمبارح رح نفطر سوا اليوم!
وأنا اطلع عالجامعة ألاقيها جايبة نص الثلاجة نضل ناكل وما نشبع ..
وتحكيلي نجيب شاورما!
ومستحيل أحكيلها لا .....
سمعت الديجي بحكي رقصة خاصة للعروس وصاحباتها ...
وقفوا كل البنات حواليها، أنا رحت أمسح دموعي، اطلعت عليها كانت تدور علي، بس شافتني تمنيت إنه ما تخليني أرقص معها ما بدي أخرب فرحتها عليها، إجت مسكتني وصارت ترقص معي، أنا أحاول ما أبكي، حضنتني وفرطنا من العياط .....
في بنت صاحبتنا إجت أخدتني عجنب حكتلي خلص مو مستاهلة، هالأيام في فيسبوك وتواصل، وكلها كم سنة وبتيجي تزورنا ....
صفنت .. بس كم سنة!
مين إلي رح يجي يدق عباب بيتنا مثل الهجوم المسلح عشان هي زهقانة، مين إلي رح تتصل بنص الليل تحكيلي أنا جعانة ومفلسة أعمل أكل؛ وأسب عليها وعاليوم لي صاحبتني في، مين لي بمكالمة وحدة ممكن تقلب مزاجي ....
هي صحيح رح تتزوج، بس حيصير عندها زوج ومسؤوليات، مش رح تضل تحكي معي 24 ساعة، وغير هيك هي رح تسافر!
يعني فش عيونها إلي مثل الصراصير، ولا نظراتها لما تشوفني زعلانة؟ ما في عفريتة تنطلي كل شي يلا نروح ناكل ... لمين رح أعمل سكرين شوت وأحكيلها عن دواويني أكيد حيتغير كتير شغلات
عارفة شو ... أنا عارفة إنه لازم أكون مبسوطلها وإنه بيوم حروح أنا كمان!
بس أنا نفسي بهاللحظة ما نتزوج، نضل أنا وهي وبس!
حكتلي يا بنت الحلال إنتي قالبتيها دراما حيجي يوم وتصاحبي غيرها وإنتي رح تتزوجي وتلتهي ... قلتلها حيجي يوم والتهي، بس مش حييجي يوم تنعاد في أحلى صحبة، صاحبة أوثق إنها أهبل مخلوق بالدنيا، مع هيك أكثر حدا فاهمني بالدنيا، وبتعرف دواويني أكثر من إمي ...
خلص العرس، طلعت بستها، حضنتها، عيطت عيطت عيطت وعيطت وتشحبرنا، وودعتها وأنا بدعيلها تعيش أحلى حياة مع زوجها فرحتلها
وبعد 3 سنين رجعت عالبلد، أنا كنت متزوجة وقتها، صحيح ما ضلت صحبتنا متل أول بس كل يوم كنا نحكي ...
جايبتلي الصورة، وبتحكيلي شوفي أشكالنا قال بنعيط عبعض!
اطلعت فيها وقلتلها بالله ما اشتقتي لأيام الجامعة وصحبتنا ...
قالتلي لا لشو بدي اشتقلك، تعالي أخرفك شو صار معي بالغربة ...
بلشت تحكي ... سمعنا بنتها بتعيط .. قلتلها روحي شوفي بنتك ... مسكت بنتها وصارت تعيط هي كمان قلتلها مالك؟
قالتلي: اشتقتلك ... جد اشتقتلك ..
الصحبة الحلوة ما بتتعوض، إحنا مش بنخاف نخسر صاحبة لإلنا لإنه ما في غيرها، لا إحنا بنخاف نخسر كل الشغلات الحلوة والبشعة الي ما بتصير إلا مع هالصاحبة الوحيدة إلي فاهمتنا بدون ما نحكي".
كتابة هديل قاسم
* النص من خيال الكاتبة
